李政宰當眾逗玩李炳憲下巴 任時完期待新作品與觀眾見面

萬眾期待嘅神劇即將推出第二季，主演嘅李政宰、李炳憲呢日帶領一眾演員魏化儁、任時完、姜河那、朴成焄及李陣郁等出席新劇記招，場面非常浩大。

眾演員現身宣傳新劇。
李炳憲喺上一季驚喜現身，令人非常期待佢同李政宰喺續集中嘅合作，而呢次亦係佢哋相隔26年後再搭檔，李炳憲笑言自己26年前同李政宰合作時只得3歲，點知李政宰聽完就即時好似對小朋友咁逗對方下巴，令到現場眾人大笑不已。
李政宰逗玩李炳憲下巴。
對於第一季被視作神劇仲成為全城熱話，作為第一男主角嘅李政宰 同 導演 黃東赫 都坦言相當大壓力，李政宰指喺片場除咗拍攝第二季嘅片外，仲要拍埋第三季嘅嘢，所以拍攝量好多，花嘅時間亦好多，佢哋喺體力同精神上嘅負擔亦非常厲害，正因為咁喺拍攝時佢哋都盡量按照導演嘅想法去拍攝，不過而家喺記者會上見到咁多傳媒朋友，李政宰就話覺得佢哋套劇一定要成功呀。
任時完
新一季有唔少新角色，都係搵嚟當紅演員飾演，好似一向係票房保證嘅任時完，佢喺劇中戲份都好重，笑言自己係第一季嘅熱血粉絲，之前仲一直期待幾時會有第二季，當佢知道可以去第二季試鏡時，自己相當感動，所以佢好期待呢個作品可以同大家見面。