古仔領軍賀歲電影搶閘宣傳 古仔盼重拍經典《嚦咕嚦咕新年財》

古天樂 梁詠琪 王丹妮 周秀娜 等參與演出嘅賀歲片，喺聖誕前搭閘宣傳，吸引大批出外買禮物嘅市民圍觀，一眾演員仲喺台上大玩兒時遊戲「猜皇帝」，而扮演古仔同Gigi囡囡嘅小演員 王尹菁 仲大爆現今小學雞們嘅玩法，嚇到「父母」都即刻「嘩」一聲叫出嚟。

古天樂同一眾演員為賀歲片宣傳，齊齊猜皇帝
雖然係賀歲電影，不過當中就不乏動作戲份，除咗事先張揚嘅女演員要上擂台之外，古仔亦都要上陣，仲同負傷頂硬上嘅 張文傑 對打。至於Gigi就指Louise同娜姐打鬥場面唔少，自己就好彩係咁易打吓就完成喇。
古仔仲指拍攝時張文傑帶傷死頂拍攝

每年過年重播嘅賀歲片睇一次就笑一次，而古仔就指曾有意重拍經典作《嚦咕嚦咕新年財》，不過擔心難以超越前作，加上自己唔識打牌，回想當年拍攝都非常困難。
佢同Gigi都有參演嘅《嚦咕嚦咕新年財》成為經典，古仔指有意拍類似題材，不過認為難以超越舊作

有份演出新片嘅 陳湛文 將獲娜姐同Louise爭奪，呢日佢講起都一面笑意，仲話今次終於恨到獲兩位靚女爭風呷醋鬥到上擂台，兩位美人仲話愛Peter愛到難捨難離，所以一見面就乜都唔使講打贏話事。

陳湛文戲中被王丹妮同周秀娜力爭，仲呷醋到為佢大打出手