姚焯菲抱病宣布將加入《愛‧回家》 劉穎鏇有父母陪過溫馨聖誕

由新西蘭學成歸港嘅姚焯菲，多咗好多時間同小菲象見面，聖誕節正日，佢又聯同一班歌手包括魏浚笙以及Lolly Talk一齊出席音樂派對，大家輪流上台獻唱，現場充滿青春氣息。
姚焯菲呢日出席聖誕活動。
呢日聽到Chantel把聲好似有啲沙沙地，原來佢係抱病上陣，不過敬業嘅Chantel依然落力演出，仲特登選唱咗一首好有聖誕氣氛嘅歌送俾大家。而講到聖誕節嘅慶祝活動，Chantel就話活動前已經同屋企人食咗聖誕lunch。
Chantel呢日把聲沙沙地，原來係抱病上陣。
Chantel呢日亦有好消息宣布，事關佢喺下年三月升讀大學前暫時會留喺香港，所以佢將會加入《愛‧回家》劇組，Chantel仲開到聲話，希望同周嘉洛飾演嘅金城安可以有多啲對手戲。
劉穎鏇
另一邊廂，劉穎鏇亦出席一個美食節活動，今個聖誕Tiffany過得特別開心，事關佢嘅父母特登由美國飛來陪佢過節，「其實都好多年冇試過，因為媽咪主要都留喺美國嗰邊，所以今年好開心。」尤其Tiffany嘅父母都係12月生日，所以除咗聖誕仲可以陪父母過埋生日。

開心事唔止咁少，佢地一家人仲啱啱去完日本旅行，孝順女Tiffany仲一手包辦所有行程安排，父母只需要跟住佢行就得啦！

萬千星輝頒獎典禮即將於1月19號舉行，Tiffany憑《飛常日誌》有份入圍最佳女配角十強，不過佢對獎項就冇乜信心，反而希望扮靚啲爭取最佳衣著獎。