趙雅芝盼再與周潤發合作 朱凱婷自認怕羞唔敢拉票

朱玲玲 趙雅芝 陳茵媺 朱凱婷 同 戚黛黛 呢日以慧妍雅集成員身份嚟參觀 發哥周潤發 嘅攝影展。

朱玲玲帶領幾位慧妍雅集成員參觀發哥近日舉行嘅攝影展
趙雅芝表示未睇攝影展前，以為發哥影相以寫實為主，但睇完影展先發現除咗寫實嘅作品外，仲有好多好抽象嘅作品，所以相當有驚喜。趙雅芝又指因為曾同發哥合作過，所以大家都有深厚嘅感情，而家再嚟睇對方嘅影展感覺相當親切。問到有冇當年發哥百厭嘅事蹟可以同大家分享？趙雅芝就指對方唔算百厭，只係比較活潑，有無窮精力嘅人，佢又指除咗對劇本同休息外，發哥係一個好肯幫助別人嘅人，拍攝換場地時仲會幫啲crew手拎器材。
趙雅芝指如有機會非常希望同發哥再次合作

趙雅芝已經好耐冇喺香港劇集中同觀眾見面，佢坦言自己都有戲癮，特別係睇到好嘅電影同劇集時，戲癮就會更大。講到當年同發哥喺《上海灘》入面飾演嘅許文強同馮程程，成為劇集嘅經典CP，趙雅芝坦言都想再同對方再合作，至於問到想同發哥演咩角色？趙雅芝就表示要睇角色啱唔啱佢哋嘅年齡、劇情適唔適合佢哋演喇。
呢日亦提到當年合作《上海灘》嘅點滴

慧妍雅集係發哥慈善攝影展嘅受惠機構，身為會長嘅朱凱婷就身體力行去認購發哥嘅作品，佢仲話好多主題佢都好鍾意，所以真好難揀，最終佢就揀咗一幅影紫色花嘅作品，朱凱婷指除咗自己鍾意紫色外，平時佢都鍾意影花㗎。對於入圍《萬千星輝頒獎典禮2024》嘅「最佳女主持」十強，朱凱婷表示入圍已經係公司同觀眾肯定咗佢喺主持方面嘅能力，不過因為自己怕羞，唔敢向陌生人拉票，所以都係喺自己嘅社交帳號上呼籲大家投佢一票咋。

朱凱婷入圍台慶頒獎禮嘅最佳女主持10強，不過佢就話唔好意思拉票喇