何展睿出新專輯為媽媽康復路打氣 盼望給予同路人鼓勵

唱作歌手何展睿相隔4年推出新專輯，呢次佢一手包辦創作，以治癒為主題，何展睿指呢幾年生活有唔少經歷，而其中一首歌更係為媽媽而創作，希望為媽媽打氣。

何展睿相隔4年後再推出新專輯
何展睿呢兩年內面對愛犬走咗，媽媽又出事由昏迷到甦醒，陪伴媽媽積極上堂去康復，當中有好多故事想同歌迷分享，朋友建議佢出一啲治癒系嘅音樂，有七至八首歌都係佢親自彈琴，除咗係送畀媽媽嘅聖誕禮物後，盼望給予同路人鼓勵，想大家知道家人嘅鼓勵係好重要。
佢更希望歌曲可以為大家帶來治癒嘅效果

何媽媽年頭因腦瘤爆裂喺ICU留醫，一度陷入昏迷，何展睿透露媽媽日漸康復，目前以輪椅代步，有練習緊企起身，何展睿喺呢半年一直陪媽媽去做復康練習，當見媽媽企到起身，何展睿覺得好感動，而媽媽喺飲茶嗰陣聽到阿仔送嘅歌，亦一邊聽一邊喊，何展睿覺得音樂嘅意義就喺度。何展睿呢次更去沖繩拍專輯封面，過程面對唔少難題，努力追趕住自然景色，幸好有太太監督下，排除萬難一一搞掂。