眾星體驗港珠澳大橋半馬拉松 陳山聰呻唔夠喉陳瀅澄清新緋聞

港珠澳大橋馬拉松活動日前舉行，吸引8千名跑步發燒友參加，當中亦有唔少藝人參與，好似 陳山聰 陳瀅 胡鴻鈞 朱敏瀚 梁競徽 陳敏之 阮浩棕 孔德賢 關嘉敏 李爾晨 等，難得可以喺港珠澳大橋跑步，大家都相當興奮邊跑邊打卡，特別係跑開馬拉松嘅山聰就大呻唔夠喉，因為佢只被安排跑兩公里嘅路程，希望出年有機會跑足全程。 

港珠澳大橋馬拉松邀請多位藝人參加
梁競徽大讚喺大橋跑步風景一流，平日只能坐車經過大橋，呢日跑跑吓見到太陽升起，佢都忍唔住邊跑邊拍。而朱仔就同陳瀅等孖住慢跑，以打卡為主，邊跑亦邊幫好友拍片影相。
早前傳出緋聞嘅陳瀅，呢日解釋男方只係好友，連朱仔都幫手解畫

Jennie早前到沖繩出席朋友婚禮，更同一位異性頭貼頭合照，繼而傳出有新戀情，去完旅行返港嘅Jennie終於有機會澄清，指合照嘅異性只係好友，對方仲係名草有主經已有女友，作為好友嘅朱仔亦幫口澄清話呢位異性佢都認識。
陳敏之呢日亦帶埋囝囝子樂參加活動

敏之呢日亦帶埋囝囝子樂一齊出現，佢都話平時工作之外都珍惜親子時光，因為擔心子樂再大一啲就有自己嘅天地，唔願意跟媽咪。但係子樂聽到媽咪咁講就好窩心地回應話絶對唔會。