電影評論學會大獎｜劉青雲談善言封帝稱后 《九龍城寨之圍城》奪最佳電影

經歷咗長達九小時嘅激烈討論及三輪投票，第31屆「香港電影評論學會大獎」賽果出爐，由翁子光執導，劉青雲、谷祖琳領銜主演嘅電影《爸爸》，繼早前第37屆東京國際電影節、第21屆香港亞洲電影節、第18屆亞洲電影大獎後，今日再次傳來喜訊！《爸爸》榮獲第31屆「香港電影評論學會大獎」嘅「最佳導演」、「最佳男演員」及「年度推薦電影」3個獎項。
《爸爸》劇照。劉青雲五獲電影評論學會大獎「最佳男演員」
呢次係青雲繼電影《高度戒備》、《絕世好Bra》、《奪命金》同《竊聽風雲3》之後，第五度獲得電影評論學會大獎「最佳男演員」，佢以一票之差，力壓《看我今天怎麼說》嘅游學修奪得影帝殊榮，而電影自上映以來，觀眾普遍認為呢部戲係劉青雲從影以來最佳嘅演出。
翁子光奪最佳導演。
奪得「最佳導演」嘅翁子光表示：「好高興劉青雲得獎，『爸爸』被欣賞係我拍這部電影最大嘅願望，希望到金像獎『媽媽』跟『兒子』、『女兒』都有好運氣﹗」
談善言憑《虎毒不》奪最佳女演員。
至於「最佳女演員」競爭亦都相當激烈，最後由談善言憑《虎毒不》以一票之差，力壓之前獲得金馬獎最佳女主角嘅鍾雪瑩。奪下人生首座影后獎項嘅談善言激動表示：「呢個係我演員生涯中獲得嘅第一個電影獎項，對我來說意義非常重大。」佢唔止多謝大膽起用佢嘅陳小娟導演以及戲中嘅對手們等等，亦感激家人畀佢做自己想做嘅事，佢仲話如果獎項有一種力量，我願將呢種一點點嘅力量分畀世上每位母親，畀佢哋知道自己並唔孤單。
《虎毒不》劇照。
「最佳電影」亦都爭持激烈，五部入圍電影，各有賣點，最終由鄭保瑞執導嘅《九龍城寨之圍城》同翁子光執導嘅《爸爸》對決，前者以些微票數險勝奪獎。
《破。地獄》劇照。
編劇獎項方面，由《臨時劫案》脫穎而出，擊敗《我談的那場戀愛》和《從今以後》等強勁對手，奪得「最佳編劇」獎。
《我談的那場戀愛》劇照。
推薦電影十部，包括《臨時劫案》、《十方之地》、《香港四徑大步走》、《看我今天怎麼說》、《從今以後》、《我談的那場戀愛》、《爸爸》、《冬未來》、《破。地獄》以及《得寵先生》。
《得寵先生》劇照。