蔡卓妍講母女相處感觸哽咽 曾因Sa媽隱瞞做小手術感內疚：佢驚我擔心

有「龍虎豹」之稱嘅容祖兒（Joey）同Twins主持嘅真人騷節目《因為是朋友呀2》喺到第五、六集繼續新加坡之旅，「龍虎豹」喺陸上嘆完美食後轉戰去郵輪玩到出海。三位邀請高海寧（高Ling）擔任嘉賓，高Ling仲帶埋媽咪上船玩，實行寓工作於娛樂！

鍾欣潼、容祖兒、高海寧及蔡卓妍喺郵輪玩餐飽。

四人參觀完郵輪各種活動後，決定齊齊試玩「甲板跳傘」，Joey率先上陣，玩完後，鍾欣潼（阿嬌）就扮演特約記者採訪叫Joey講感受，蔡卓妍（阿Sa）得到Joey傳授嘅秘訣後成功飛起。最後輪到高Ling，只見佢不停盤旋，雖然十分搞笑，但係佢玩得好過癮，大叫好爽。

高海寧擔任嘉賓，高Ling仲帶埋媽咪上船玩，實行寓工作於娛樂！

四人同高媽媽一齊餐，高Ling分享自己同媽媽相處點滴時，令阿Sa十分感觸，更一度哽咽：「入行開始媽咪一直幫我理財，但呢幾年開始覺得媽咪老啦。媽咪開始約我去銀行或者見律師，媽咪話：『你知唔知，媽咪真係老啦，我唔係唔想幫你，只係我怕我冇呢個能力。』佢係希望我學習，我都要自己知道點樣生活。」

高Ling分享自己同媽媽相處點滴時，令阿Sa十分感觸。
阿Sa形容母女性格超級相似，Sa媽就算病，要去做小手術，更瞞住阿Sa，阿Sa續道：「我係你個女嚟㗎嘛，我希望你會話我知，但佢就係驚我擔心，但最後都係會畀我發現，我發現咗我又會好內疚。」

阿Sa講起Sa媽十分感觸，更一度哽咽。
Joey聽完阿Sa分享亦坦言有相同感覺：「我同媽咪都係咁，有時我會問佢：『你要唔要同我一齊去旅行？』以前佢係唔會考慮，會同我一齊飛，但而家嘅佢比較鍾意留喺屋企。」Joey希望自己有多啲時間，可以喺屋企陪媽媽。