獨家丨袁詠儀為鍾澍佳強勢回歸拍劇 自爆要求羅子溢 陳自瑤入劇組

金像影后袁詠儀相隔16年重返TVB拍攝新劇《模仿人生》，呢次亦係靚靚繼2009年《富貴門》後再回巢拍劇。日前靚靚同羅子溢、陳自瑤（Yoyo）、陳楨怡、黎燕珊、吳瑞庭一齊喺深圳開工，電視廣播有限公司行政主席許濤亦專程探班為劇組打氣。

袁詠儀相隔16年重返TVB拍攝新劇《模仿人生》。主席許濤（右1）亦專程前來探班。
靚靚隔咗咁多年願意再強勢回歸拍劇，一切都係因為監製係鍾澍佳！靚靚大讚佳導近年作品出色優秀，亦透露之前佳導有拎作品同自己聯絡過，而自己表示有另一種類型想拍，之後又遇到真係鍾意嘅劇本，所以就肯出山拍劇！再加上靚靚老公張智霖（Chilam）都好支持老婆工作，皆因Chilam相信「人唔做嘢係會好快死」，不過講到Chilam會唔會探班，靚靚就話Chilam好少做呢啲嘢！
袁詠儀 同 陳楨怡 拍對手戲。
靚靚雖然有段時間冇拍劇，不過佢都有追睇電視劇，仲話好鍾意《婚後事》添！靚靚更笑言自己簽約時特別要求劇組，要令《婚後事》男、女主角子溢同Yoyo一齊拍呢套劇。講到同兩位合作感覺，靚靚都覺得好新鮮，不過知道兩位同自己都係處女座時，佢都嚇咗一跳：「咁麻煩？咁點解呢套劇唔喺八、九月拍？咁我地可以做個大生日。」
靚靚指定要 羅子溢 同 陳自瑤 加入劇組。
可以同靚靚呢位影后級前輩合作，都令子溢同Yoyo覺得好期待，Yoyo更希望可以同靚靚有多啲對手戲。至於子溢就認為一切都係緣份，因為之前自己同Chilam合作，而家又有機會同靚靚合作，令佢興奮得嚟又戰戰兢兢，好似追女仔咁啊！