蕭正楠首次掂奶樽挑戰沖奶粉 表現雞手鴨腳 ：總之佢一定有奶飲

蕭正楠同陳曉華（Hera）呢日以喜慶裝束現身商場新春活動擔任嘉賓，Hera入行將近6年，每次去唔同地方，同觀眾見面都係好開心體驗。
蕭正楠呢日同陳曉華一齊出席活動。
阿蕭獻唱輕快歌曲《藍天》為觀眾助興，緊接阿蕭唱《小小大人物》之前，解釋呢首歌係獻畀天上嘅爸爸，而阿蕭今年亦準備做爸爸，覺得呢首歌特別有意思，好想喺現場送畀大家。
活動上蕭正楠獻唱助興。
阿蕭指呢日商場聚集咗好多人，佢同Hera跟市民拜個早年，感覺非常開心，佢哋更邀請觀眾一齊上台玩，挑戰沖奶粉同換尿片，好似對準爸爸阿蕭有啲難度，見佢表現雞手鴨腳。
蕭正楠首次用奶樽，沖起奶上嚟雞手鴨腳。
阿蕭笑指呢啲係演技，純粹為咗搞氣氛，阿蕭坦言今次係第一次掂奶樽，沖法同健身奶粉有啲唔同，佢相信試三、五次一定成功，總之阿B一定有奶飲，叫大家可以放心！而阿蕭同老婆黃翠如準備上育嬰班，有人教佢哋照顧BB嘅步驟及簡介湊B過程，屆時攞定note去學嘢。