林沚羿新歌以思念家庭為主題 遭父林迪安嘲因一個原因而想家

林沚羿（Venus）與爸爸林迪安呢日一齊去電台接受訪問，兩父女暢談新年大計，Venus最近忙碌籌備新歌，目前仲揀緊編曲，期待新作品可以快啲同大家見面。
林沚羿與爸爸林迪安呢日一齊接受電台訪問。
Venus新歌以想念屋企為主題，而爸爸林迪安事前完全唔知，Venus諗起以前喺外國留學，住過唔同嘅地方，去到邊都會帶住一種掛住屋企嘅心態，所以Venus想作一首歌係講呢個感覺；爸爸林迪安笑指阿女年紀大，開始咩都要自己畀錢，佢笑阿女因為咁有啲掛念屋企。

Venus同爸爸林迪安呢對父女檔近年喺綜藝節目、慈善騷及網上平台均有合作，二人大獲好評，林迪安坦言自己做呢行已經定咗形，而阿女仲有好多空間，可以有唔同渠道去發展，又有監製搵佢哋拍短劇，佢哋嚟緊有唔同計劃作出更多新嘗試。