洪永城細女眼肚長士多啤梨痣疑接受激光治療免影響視線

洪永城同老婆太太梁諾妍（Inez）早前透露細女Beryl出世2至4星期後出現「士多啤梨痣」，由於「士多啤梨痣」近眼肚位置，佢哋擔心若果變大有機會影響Beryl視線，為咗減慢「士多啤梨痣」生長速度，佢哋要早晚為細女敷藥水，而Inez今日喺社交平台再貼出Beryl近照，Beryl似乎已接受微激光治療。

Inez喺社交平台貼出一張手抱細女Beryl嘅相，見細女Beryl眼肚位置貼咗一塊小紗布，似係啱啱接受完治療，Inez話要好好紀錄先再同大家分享。

洪永城同老婆太太Inez去年3月迎來細女Beryl，早前網民發現Beryl眼肚疑似「受傷」，Inez就解釋紅點係血管痣（又稱士多啤梨痣），洪永城話若果將來Beryl血管痣持續增大，可能需要做激光治療，屆時仍需要聽從醫生專業建議，而Inez亦有講過擔心阿女「士多啤梨痣」接近眼睛位置，接受做微激光，令「士多啤梨痣」變平滑及淺色，憂影響阿女眼睛健康。