萬千星輝頒獎典禮2024丨視帝視后10強人馬心情輕鬆 頒獎禮戰衣準備就緒

電視界盛事《萬千星輝頒獎典禮2024》將於1月19號星期日假澳門舉行，而今屆視帝視后競爭激烈，一眾入圍「最佳男、女主角」十強嘅候選人林夏薇、龔嘉欣、蔡潔、蔣祖曼、姚子羚、鄭則士（Kent哥）、黎耀祥、譚俊彥（Shaun）同陳展鵬現身記招會見傳媒。
女主角候選人們
薇薇悉心打扮為自己造勢，佢特別配戴黑色系列首飾，子羚問係咪今日出席嘅藝人都有一套，嘉欣笑指大家可以憑訪問片取首飾，佢又指一個角色嘅成功，其實背後係經過好多人付出。嘉欣會以平常心看待獎項，但佢話頒獎禮係一個難得機會等大家扮靚出席，同埋一齊去澳門玩。
薇薇悉心打扮為自己造勢
蔣祖曼覺得可以跟大家候選已經滿足，身邊嘅蔡潔都話會好好享受過程；子羚同張振朗喺《反黑英雄》CP大獲好評，振朗日前喺盆菜宴公開為子羚拉票，子羚話好想拍檔能奪得視帝，但好可惜今年冇咗螢幕CP嘅獎項，蔡潔話兩人係「最佳兒時偶像CP」。
黎耀祥、鄭則士、譚俊彥、陳展鵬。
幾位候選視帝將奪獎信心就表現得好謙虛，兩位重量級候選人Kent哥同祥哥更係你推我讓，Kent哥話入到十強已經滿意，祥哥都話候選人均實力相當，而今年每個角色戲種都好唔同，展鵬就話能夠同兩位前輩齊齊躋身十強已經開心，仲有唔夠三日就到頒獎典禮舉行嘅大日子，一眾準視帝視后已準備戰衣，當中有人以簡樸為主，亦有人揀選穿着幸運顏色。