萬千星輝頒獎典禮2024｜神秘頒獎嘉賓逐一公佈 資深螢幕組合舞台重聚

無綫年度盛事《萬千星輝頒獎典禮2024》星期日晚再次於澳門上葡京綜合度假村舉行，除翡翠台之外 myTV SUPER、TVB Anywhere 以及 埋堆堆 屆時亦會同步轉播。

《萬千星輝頒獎典禮》每年都會邀請重量級演藝人擔任頒獎嘉賓，今年據知亦有影壇巨星同男神加持，更有久未於頒獎典禮亮相嘅視帝級人馬、仲有已一段時間未同觀眾見面嘅前資深主持；以及久別重逢嘅無綫經典組合參與。

其中兩大經典組合已經公開，分別係相隔23年再於螢光幕合體嘅《無頭東宮》陳妙瑛、向海嵐，以及曾合作拍攝《義不容情》、《我本善良》、《今生無悔》等經典劇集嘅90年代公認「最佳螢幕情侶」邵美琪同溫兆倫。

陳妙瑛同向海嵐喺2002年播出嘅《無頭東宮》中分飾楚楚同凌雲，因被換臉大師（魏駿傑 飾）容貌交換，兩人命運亦從此逆轉、姊妹情決裂。因劇集題材新穎，當年播出後大獲好評，而《無頭東宮》亦係陳妙瑛告別幕前作品，後來佢全面淡出娛樂圈、成功轉營為商界強人，不過同向海嵐一直保持聯絡，去年仲現身支持Anne參演嘅《我們的青春日誌》舞台劇。陳妙瑛相隔逾20年重返娘家，將再同最佳拍檔向海嵐齊齊頒獎。

而邵美琪同溫兆倫，自2015年齊齊亮相內地節目後、相隔逾9年再於幕前合體，當年兩人首度合作《義不容情》，劇中丁有康（溫兆倫 飾）另結有錢新歡、將女友趙加敏（邵美琪 飾）狠心推出火車一幕，令人記憶深刻。

早前於內地節目同框，溫兆倫仲喬裝亂入向邵美琪送驚喜，仲即場話：「認識你是我一生中很幸運的事，無論發生甚麼事，無論你在哪裏，我永遠都會是你最好的朋友，我會永遠守候着你。」

後來Maggie慶祝入行40周年派對，溫兆倫亦拍片祝賀：「我同妳嘅相處，只會感受到開心、 快樂，從來冇認真同妳講多謝，多謝咁多年嚟同我合作咁多經典劇。入行40年唔簡單，人生有幾多個40年？之後無論工作、生活上，溫兆倫永遠支持妳。」 Maggie聽完仲感動到眼濕濕。

《萬千星輝頒獎典禮2024》紅地氈盛況直擊 星期日晚 17:30 TVB娛樂新聞台 網上直播

《萬千星輝頒獎典禮2024》 星期日晚 20:00 翡翠台 現場直播