Lolly Talk為紅十字會活動任大使 樂壇女團大戰冇有怕期待新血

女團 Lolly Talk 將為3月舉行嘅紅十字會城市定向活動擔任星級大使，屆時8位成員仲會到訪實體打卡點同各位參加者打氣。日前佢哋為活動拍攝宣傳影片，Sinnie吳倩怡同Yanny劉綺婷透露早已參加過紅十字會活動，仲自嘲孤陋寡聞，因為親身接觸後，先知道香港紅十字會喺香港同世界各地都有提供援助服務。

Lolly Talk將為香港紅十字會嘅定向活動擔任大使
Sinnie仲話：「香港人生活喺咁急促嘅城市入面，好多人都有亞健康(慢性疲勞症候群)，真係好需要關注情緒。我同Yanny都好容易墮入焦慮，尤其係有啲重要嘅表演，當時紅十字會心理支援服務嘅同事就教我哋點樣緩解情緒，唔止我哋受惠，仲可以分享畀其他人知道。」

Yanny仲話：「工作人員教我哋有壓力時就用腹式呼吸，同埋學識咗做個聆聽者，聽吓人哋嘅需要，其實已經幫咗好多。」
早前為活動拍攝宣傳片時，仲對紅十字會加深唔少了解

而阿蛋黃詠霖鉑參加過野外定向活動，佢話：「好好玩、好開心，可以四圍跑。好記得有次我哋係夜晚嘅森林進行野外定向，我嗰陣好細個，又怕黑又怕蟲，森林好黑，得支電筒仔先睇到少少路。我就要喺樹嗰啲位搵標記，我一掂落棵樹，個觸感咁奇怪，郁郁吓嘅？原來係兩隻手指咁粗嘅蟲，我勁驚，大叫，最後要其他隊友幫我完成。」

Mei Mei曾美欣就稱為自己同Yanny係認路小神童：「平時我哋做嘢、去旅行，都係我同Yanny做人肉導航。但係如果去工廠區開工，就會8個變晒路痴，因為啲路呀、門口呀，太似啦，搞到我哋成日都行錯路。」 
成軍踏入第3年嘅佢哋，對2025年發展已經定立唔少計劃

Lolly Talk去年推出首張專輯，而2025年目標係繼續創作更多音樂同唔同內容，Tania陳紀澄話：「我哋想同唔同朋友合作，睇吓有咩新火花。始終都踏入第3年，想展現更成熟、更有魅力嘅女團畀大家睇。」而Elka鄭芷淇就期待拍攝旅遊節目喇。
仲希望今年推出更多作品咁話

有傳今年將有更多女團加入樂壇，Ahyo郭曉妍認為係好事：「我覺得女團有越來越多同行者，其實整件事好有能量，希望有越來越多唔同嘅可能性，大家一齊玩！」