蔡一智「登六」香港台灣生日派對曬樂悠咭 除衫騷肌感謝發哥啟蒙戰勝年齡數字

草蜢成員蔡一智本月初生日，踏入60歲嘅阿智設計一系列利是封、T恤同圖畫等周邊產品，分別喺香港同台灣舉行巡迴生日Party與歌迷聚會，阿智更展示最近考獲運動教練證書同「樂悠咭」，除衫大騷三頭肌老鼠仔，證明毅力可戰勝年齡數字。

草蜢成員蔡一智分別喺香港同台灣舉行巡迴生日Party與歌迷聚會。
香港站生日會有拍檔蘇志威現身，全場非常驚喜。阿智許願時合十：「希望大家身體健康，每天開開心心、順心！」阿智指中國曆法60年一個甲子，一個甲子一個新開始，佢覺得係一個黃金嘅歲月，由年輕去到而家白髮造型，順其自然咁慢慢老去，係好值得開心嘅事，所以阿智希望同歌迷分享踏入甲子嘅喜樂。

阿智同歌迷一齊玩遊戲、兼真情對話。
阿智感謝好友同歌迷為佢辦幾場「登六」生日會，當中最開心係偶像發哥周潤發到賀，令佢感受到滿滿嘅愛；阿智特別感謝老闆林建岳全力支持草蜢40周年，盡快攞到紅館檔期，同埋世界巡演。

阿智除衫大騷三頭肌老鼠仔，證明毅力可戰勝年齡數字。
阿智「登六」分別喺香港同台灣與幾百位歌迷舉行聚會慶祝60歲生日，阿智同歌迷一齊玩遊戲、真情對話，歌迷表示：「去年我身體發生狀況，我跟自己說要盡快調理好，要跟草蜢慶祝40、60周年，100歲也跟你們一起。」阿智上前擁抱以示感激及支持。

阿智展示最近考獲運動教練證書。
有媽媽級歌迷兒子當日生日，未能出席歌迷生日聚會，媽媽全程手機直播，阿智對住手機講：「我是真的蔡一智，我不是AI。」另有歌迷夫婦「自首」，去年七月拋下兒子飛新加坡追星睇草蜢演唱會，身旁嘅阿仔聞言O嘴，全場爆笑，仲話今年如果香港舉辦草蜢40周年演唱會，佢哋先帶埋阿仔來港捧場。

阿智指中國曆法60年一個甲子，順其自然咁慢慢老去，係好值得開心！
阿智笑指好多歌迷講「我從小就喜歡你」呢句話入咗腦，同時令佢好感動，佢寫咗首新歌《我從小就喜歡你》希望盡快錄好，同大家分享；而阿智喺今年香港生日會分享咗剛攞到嘅「樂悠咭」，台灣生日會就分享剛考到嘅運動教練證書。

阿智許願時合十，祝歌迷身體健康，每天開開心心、順心！
阿智建議明年生日同歌迷一齊做運動，仲即場騷肌肉，鼓勵大家要堅持；阿智感謝呢幾年同發哥去跑步做運動，見到發哥啟發同幫咗好多人，阿智都覺得好有意義，於是阿智花咗兩年考執照，希望專業地去教人用正確方式去做運動。

香港站生日會有拍檔蘇志威現身，全場非常驚喜。