蕭正楠熱衷用食物幫BB改名 翠如大肚睇「出軌劇」入戲嚇親老公

蕭正楠同黃翠如呢日夫妻檔現身新年活動，粗身大細嘅翠如狀態大好，隔離農曆新年唔夠一個星期，阿蕭同翠如已做好過年準備，屆時同發哥周潤發、華哥黃日華及其他跑友一齊先跑步，再約埋去三哥苗僑偉夫婦屋企開大餐。

翠如同阿蕭呢日拍拖出席活動，仲公開過年已經早有安排喇
阿蕭喺翠如懷孕期間一直細心照顧，不時化身廚神整嘢食，問到佢會整咩賀年食品畀翠如食，阿蕭笑指睇吓家人有咩食剩嘅嘢，再諗一啲烹飪嘅方式翻新再改造，身旁嘅翠如即忍唔住笑，話等團年飯食剩就打包返屋企，最多係初一食到初八。

翠如個肚越嚟越大，代表同BB見面嘅日子越嚟越近，阿蕭好積極幫BB諗名，仲好熱衷用食物為BB改名，譬如「蕭」叉燒、「蕭」麵包、「蕭」雞翼、「蕭」魚等，翠如爆阿蕭覺得「燒賣」呢個名幾好。
翠如仲爆阿蕭幫BB改嘅名夠晒特別

翠如笑指有咗之後食嘢方面冇虧待自己，仲有不停出街食嘢，翠如話而家鍾意好多新鮮嘅味道，去唔同餐廳食嘢就會好開心，翠如仲話一直好鍾意食朱古力，目前要注意血糖，所以佢有時會禁食甜嘢。講到老公阿蕭喺《奔跑吧！勇敢的女人們》飾演出軌渣男，翠如追劇睇到好入戲，有啲嚇親老公！

食量變得驚人嘅翠如，仲指要準備戒口喇