愛．回家之開心速遞｜姚焯菲緊張口誤令全場大笑 周嘉洛被鼓勵假戲真做嚇到口震

《愛．回家之開心速遞》嘅一眾演員呢日著得紅噹噹出席活動同大家拜個早年，新加入劇組嘅姚焯菲（Chantel）都有參與，Chantel更喺分享入劇組感受時唔小心將「飾演」講成「息影」，令大家都笑唔停口，而呂慧儀即刻幫手解圍，話Chantel只係講下笑，劉丹都話：「新加入係緊張啲。」
 Chantel加入《愛．回家》劇組。
雖然Chantel拍劇經驗唔多，不過佢嘅表現就得到「叔公」單立文同「安仔」周嘉洛欣賞。嘉洛大讚Chantel同大家磨合得快，仲已經接到大家嘅「拋波」，豹哥仲話Chantel悟性夠高添！
 周嘉洛被慫恿假戲真做。
嘉洛透露自己同Chantel已經有故事線，劇情係同誤會有關。豹哥就已經預想Chantel會唔會有拍感情戲機會，而佢聽到嘉洛講：「咁要搵一個出色嘅男人配佢。」時，就問嘉洛係咪自薦緊，仲慫恿嘉洛假戲真做追Chantel，嚇到嘉洛口震震。
 呂慧儀 張景淳眾人為張景淳慶生。
活動當日正係張景淳生日，劇組都為佢同其他一月之星齊齊慶祝一番，抱病出席活動嘅景淳就許願要身體健康。講到新年有咩特別活動，阿蟹就話要陪囝囝溫書啊。