姚焯菲現身年宵執筆獻技 爆被新拍檔周嘉洛怨恨

一班小菲象就連過年都冇休息，自發集體出動，為偶像姚焯菲擺年宵攤檔，售賣關於Chantel嘅精美周邊，而為應節仲有印有Chantel 靚樣嘅揮春。呢日Chantel就親身到年宵攤檔支持，仲即席揮毫寫揮春。

Chantel返港之後可以話未停過，呢日又出動去年宵為歌迷寫揮春喇
去年因為唔喺香港嘅關係，所以Chantel唔能夠同小菲象團年，今年因為佢留港度歲，所以佢好開心可以到現場同大家團年兼寫揮春，Chantel仲話現場氣氛相當熱鬧，又指可以即場喺隔離嘅攤檔買年糕食。 為咗幫大家寫揮春，雖然Chantel自言唔太識寫大字，就話準備咗「唔好蛇𠺌」、「蛇來運轉」同「靈蛇出動」呢啲字句送畀fans。
新派揮春亦用上俗語貼近生活

Chantel啱啱加入《愛·回家之開心速遞》劇組，佢首登場嘅戲份亦即將播出，Chantel都話自己好期待。講到劇中角色，Chantel飾演金城安嘅遠房親戚，劇中會同周嘉洛有唔少對手戲，佢就讚嘉洛係一位好好嘅演員，不過對佢做對手戲就要學識忍笑，Chantel仲劇透戲中嘉洛對佢有啲怨恨，笑言希望對方戲外對佢冇呢種情緒。呢次同咁多位前輩合作，Chantel話最難接嘅係豹哥單立文嘅戲，因為對方嘅爆肚經常會令到大家忍唔到笑。
早前加入《愛．回家》嘅佢亦分享拍攝趣事

除咗拍劇，Chantel早前仲首度參與內地大型綜藝《聲生不息·大灣區季》，節目中與容祖兒、薛凱琪、衛蘭合唱，佢嘅表現就獲唔少內地網呢大讚，Chantel就話好開心可以同咁多前輩合作，又話呢次嘅演出體驗好不一樣呀。