黃淑蔓媽媽包開心果餃子 雲浩影屋企訂盆菜由除夕晚食到初二

恭喜發財！「唱作王子」馮允謙（Jay）率領兩位美女，黃淑蔓（Feanna）及「仙氣女神」雲浩影（Cloud）向大家拜年，祝各位財源滾滾、身體健康！Jay喺外國長大，對農曆新年傳統習俗一知半解，連「碌柚葉」都未聽聞，Feanna同Cloud立即為佢惡補，當Jay聽到新年唔可以掃地就好開心，笑言好少掃地。

馮允謙率領黃淑蔓同雲浩影向大家拜年。
Jay捧住「財神」祝大家新一年賺多啲，亦希望自己事業再上層樓，寫多啲好歌、唱多啲好歌畀大家；Cloud拿住揮春：「我手上『大吉大利』揮春，寓意我開『大』啲嘅騷，然後出『大』碟，賺『大』錢唱『大』歌，盆滿缽滿，所有嘢都『大』！」Feanna就祝大家好似醒獅咁龍馬精神：「畫『蛇』添福。我係蛇女，今年犯太歲，大家都記得要去攝太歲！我蛇年心願，就希望可以做晒佢哋兩個（Jay同Cloud) 嘅願望！」

Cloud屋企就年初一唔准沖涼，話會洗走運氣。
每個家庭各有農曆新年小習俗，Feanna期待食媽媽下廚整水餃：「每年都會同爸爸媽媽一齊倒數迎接年初一。媽咪每年會包餃子，喺其中一粒餃子入面放開心果，邊個食到就嗰年會好幸運。另一個習俗就係初一唔准洗頭。」而Cloud屋企就年初一唔准沖涼，話會洗走運氣；Jay就知道新年唔可以剪頭髮。

Jay喺外國長大，對農曆新年傳統習俗一知半解，連「碌柚葉」都未聽聞。
Cloud指新年唔可以掃地，要掃都要由大門口掃入屋，咁就唔會掃走啲好運。Jay哈哈大笑稱：「放心，我好少掃地，所以屋企好污糟。」問Jay知唔知「碌柚葉」用途？Jay唔知道咩係「碌柚葉」，Feanna就解釋係年廿八連埋碌柚葉一齊沖涼寓意洗走衰運。Cloud搶答話坊間有碌柚葉嘅沐浴露，唔使真係揸住碌柚葉沖涼。

Feanna祝大家好似醒獅咁龍馬精神。
Cloud指屋企新年一定食盆菜，而且訂兩大個，由除夕晚食到年初二，仲會不停加入食物，最終變成打邊爐，而佢最愛食瑤柱，Jay就最鍾意食蝦、Feanna鍾意食髮菜。被問如果要放一樣喜愛食物入盆菜，Jay立即話：「我最鍾意食burger，但點樣放入盆菜？」Feanna笑指勁違和。