富貴千團｜湯洛雯曾收追債血書嚇破膽 與老公好友黃嘉樂上演親熱戲感尷尬

湯洛雯Roxanne喺劇集《富貴千團》入面同黃庭鋒Telford、蔣志光以及姚宏遠Lucas慘墮歐陽偉豪Ben sir嘅股票騙局而血本無歸，為咗可以追討損失，佢哋就將計就計設陷阱令歐陽偉豪受騙，再結盟組成賺錢聯盟靠財技搵快錢，點知又遇上騙徒，靚湯仲被人貼巨型街招追數。
湯洛雯喺劇中被追數。
靚湯喺現實中話自己唔會問人借錢，細個時就有一個難忘經歷，曾收過一封追債血書，當時佢好驚去問管理處，最後得知原來全層樓都收到，見識咩係大耳窿，幸好只係虛驚一場。
靚湯話細個曾收過血書。
靚湯同黃嘉樂Stephen喺劇中飾演一對夫婦，而兩人第一幕戲份就要喺廳度拍親熱戲，現實中嘉樂同馬國明係鐵馬家族好朋友，靚湯當初知道對手係嘉樂都有啲尷尬，但兩人同聲表示佢哋嘅畫面只係意識上大膽，其實唔算太誇張。靚湯同黃嘉樂喺劇中飾演夫妻。
劇中講述靚湯讀大學時同嘉樂未婚懷孕，之後結婚生咗阿仔謙B，而嘉樂不論戲內戲外都同謙B相處得好好，完全滲透住一份好爸爸嘅感覺，而靚湯就好鍾意同小朋友玩，所以一家三口戲都演得好自然。
靚湯話同老公嘅兄弟拍親熱戲好尷尬。