阿Bob新年驚聞囡囡拍拖網上求開示 圈中好友群起食花生跪求開直播

阿Bob 林盛斌 不時都會喺社交平台同大家分享唔同古怪想法，近日仲趁新年開宗名義話要帶埋三女一子四出搶錢，一家六口拍片同大家拜年，氣氛夠晒熱鬧。新正頭大家都一定笑容滿面，不過阿Bob初四出個Post，就似乎係為人父嘅必經心理大關口喇。

阿Bob一家六口化身搶錢軍團出動拜年
事關佢話寶貝女突然提出要帶「男朋友」返屋企同家人見面，話晒係前世情人，個心就點都會酸溜溜喇，於是乜大騷都做過咁滯嘅佢，就出Post向既廣大又萬能嘅網友求解，仲問有咩需要注意，不過正所謂古人都話齋：此Post必火，結果咪就係引嚟大班圈中花生友急救集合等食花生囉。
年初四突然出一個充滿醋意嘅Post

指拖嘅唔通係16歲嘅長女霏霏？

胡定欣 袁偉豪 劉溫馨 陳煒 陳家樂 岑麗香 仲有 湯洛雯 等人人都有唔同提議，叫開直播嘅有，叫佢收埋利器先又有，仲有人叫佢戴假髮扮媽咪收料，不過大家最想知都係結果到底如何，一面外父相嘅阿Bob，到底又滿意唔滿意前世情人嘅小情人呢？

佢嘅社交平台即時變成花生友集合點