至八會人日相約阿姐家中聚會 合唱 《迎春花》為網民送祝福

每年農曆新年都會有唔同嘅圈中人去 阿姐汪明荃 屋企拜年，繼早前有一眾TVB藝人拜訪後，至八會嘅成員：毛舜筠 林建明 施惠珍 江欣燕 鍾慧冰 亦喺年初七人日呢日，去到阿姐屋企相聚。
至八會成員喺年初七去到阿姐屋企拜年。
阿姐喺社交平台貼出當日合照，由於當日係人日，所以佢哋準備咗唔少「生日禮物」嚟交換，當中包括化妝品、護膚品、保暖衣服等，阿姐喺帖文中寫道：「大年初七人日。人人生日，好多姐妹嚟拜年，交換禮物，好久不見，祝各位靚女健康、平安，長壽，開心，事事稱心如意。」
眾人趁人日仲交換禮物。
而毛舜筠亦貼出當日拍嘅祝賀片，除咗同至八會眾人祝賀蛇年行大運外，阿姐仲指揮大家一齊合唱《迎春花》，相當歡樂。