陳展鵬享受與小豬比親子樂 單文柔投訴老公嫌佢水腫

陳展鵬 同 單文柔Phoebe 呢對恩愛夫妻向來都唔介意公開放閃，呢日兩公婆又拍住上一齊拍廣告，着上白色Deep V裙嘅Phoebe，對老公煎pan對望時不時會露出甜笑，唔講仲以為佢哋影緊婚紗相呀。

煎Pan同Phoebe呢日夫婦合體拍攝廣告
今次廣告同美容有關，估唔到Phoebe話老公煎pan嘅美容知識竟然比佢豐富，仲話自己都要向對方請教返點護膚，煎pan就話男士最重要都係清爽乾淨，而好似佢呢啲步入青少年期嘅，要識護膚之餘，有時都要啲醫學美容。
自稱步入青少年期嘅佢話，要好好令皮膚清爽乾淨

女仔最怕畀人話肥，Phoebe就投訴之前因為水腫搞到有雙下巴，點知就畀煎pan笑佢好似有咗咁。
Phoebe就話自己水腫而被老公笑好似懷胎一樣

雖然工作忙碌，但煎pan都會抽時間教囡囡小豬比敏功課，之前佢仲PO咗一條教囡囡數學嘅片，煎pan話自己細個時數學唔算叻，仲成日畀daddy考到面懵懵，估唔到而家竟然要教個女數學，煎pan話好在而家囡囡啲功課都仲搞得掂，加上有太太幫手所以都唔擔心，佢又指而家都一有時間都想多啲陪囡囡，平日亦會寓學習於娛樂呀。

煎Pan做Daddy之後成為優秀好爸爸