新相曝光！胡定欣與醫美男友蜜運首曬恩愛合照 洪永城被爆係媒人穿針引線

43歲胡定欣Dry足8年，終於喺去年成功脫單，大家當然好戥定欣開心啦，拍拖至今，定欣男友身份一直成謎，連樣都未曾曝光，定欣趁住喺元宵節呢日，終於喺社交平台首度上載同男友喺日本滑雪嘅照片，罕有大曬恩愛，更甜蜜寫道「親愛的，元宵節快樂﹗」

43歲胡定欣Dry足8年，喺去年成功脫單，今日更曬出男友合照。

相中所見男友高大有型，更輕搭住定欣嘅膊頭，定欣就嘟起小嘴，一副小鳥依人咁依靠喺男友身旁，隔住個mon都感受到呢對戀人有幾sweet呀。而圈中唔少朋友見到定欣公開男友照片後立即回應，林夏薇就留言派心心，袁偉豪求正面相，至於同佢哋同行嘅梁諾妍，就話「玩UNO慶祝」，睇嚟大家對定欣嘅貼文有好大迴響。

胡定欣與醫美男友早前喺日本白馬梅池高原滑雪場滑雪。

其實定欣未公開同男友滑雪嘅相片前，已有網友喺社交平台爆料，話喺啱啱過去嘅新春假期，喺日本白馬梅池高原滑雪場，野生捕獲定欣同Tony太太梁諾妍，當時有網民八卦留言問「沒看到胡定欣男友嗎？」但報料者就表示「你猜」，未有正面回應。

胡定欣身穿滑雪裝束，神采飛揚，果然係有愛情滋潤嘅女人。

唔少人以為定欣呢段姊弟戀，係林盛斌成功牽紅線，其實真正喺背後發功嗰位係洪永城先啱，有指Tony同定欣嘅男友係好朋友，Tony夫婦不時相約定欣一對情人Double Dating見面食飯，好似去年9月定欣生日，有眼利嘅網民發現相中嘅枱面有四份餐具，即係話當時定欣嘅男友亦在場，只係未有露面。

胡定欣去年9月生日時，洪永城夫婦同佢一齊慶祝，枱面擺咗4份餐具，合照只有3人，估係定欣想把男友身份保密。

至於定欣男友嘅身份，有指係一名年輕有為嘅醫美醫生，更係公認嘅鑽石筍盤，雖然兩人喺年齡上有差距，但係定欣似乎唔介意姊弟戀，仲好好保護呢段關係，堅持低調談情，為咗Keep住靚相箍實男友，定欣好勤力做Gym，兼去美容院做療程扮靚靚，相信大家都期待定欣呢段萌芽無耐嘅戀情，可以早日開花結果，咁大家就要等待定欣嘅好消息。

胡定欣與醫美男友愛得甜蜜，估計一班好友早已見過定欣男友。