陳嘉慧結婚產後復出去雲南取景 夥陳煒拍攝全新養生節目

陳嘉慧（Erica）喺2023年9月無預警下同圈外男友Calvin成婚，翌年3月就誕下B女，之後佢一直處於停工湊B狀態，當大家覺得佢會全職湊B照顧家庭嘅時候，佢就復出參與全新節目《養生之旅》嘅拍攝，Erica話估唔到差唔多過咗兩年時間，再次出現喺幕前，內心覺得幾感觸，因為冇諗過結婚生女後仍然可以喺幕前工作。

陳嘉慧復出參與全新節目《養生之旅》嘅拍攝。
Erica希望新一年多啲工作同大家見面，因為佢冇諗過要全職留喺屋企做家庭主婦。講到參與今次節目，Erica指監製覺得佢需要學習養生去調理身體，加上產後增磅不少，要好好修身。佢又話作為媽媽，要平衡工作同照顧家庭兩方面。

Erica希望新一年多啲工作同大家見面，因為佢冇諗過要全職留喺屋企做家庭主婦。
去年11月同老公遇上車禍，當時以經歷生死形容，原來車禍中佢肺部被車內安全氣袋撞扁受傷，至今仍然未完全康復，佢話跟師傅練太極時，覺得呼吸未太順暢。

首日上堂嘅煒哥感激師傅用心教導，因為成個過程都唔易。
為咗今次節目，Erica聯同陳煒、文凱婷、《中聲3》鍾凱瑩跟李暉師傅學耍太極作出發前準備，而首日上堂嘅煒哥感激師傅用心教導，因為成個過程都唔易，李暉師傅解釋因為大家所學嘅係經典動作，所以有一定難度。

四位會兵分兩路出發，煒哥同鍾凱瑩赴貴州拍攝、另一隊Erica同Aeren就出發去雲南。
節目中，四位會兵分兩路出發，煒哥同鍾凱瑩赴貴州拍攝，已為人母嘅鍾凱瑩話交低仔女畀老公何基佑照顧。另一隊Erica同Aeren就出發去雲南，Aeren話擔心自己操之過急性格，會影響節目養生嘅寧靜氛圍，而Erica就期待穿當地民族服。