星光路上丨林盛斌再澄清婚宴被整蠱不知情 期待仔女見證自己登上紅館

林盛斌 繼續作客《星光路上》接受主播 潘盈慧 專訪，阿Bob被喻為行內MC王之一，而佢喺李思捷嘅節目《玩嘢王》中被玩一幕，至今仍然有人質疑阿Bob事前係知情，知道當日嘅婚宴係整蠱節目。

阿Bob再強調唔知情，因為當日發生嘅事，其實喺日常主持工作中都會遇到，只係當日突然一次過遇上。佢又話自己投入咗喺工作就唔會多想，加上亦真係見過李思捷飲醉酒上台唱歌，，所以唔覺得奇怪。
Bob指當年《玩嘢王》嘅整蠱自己事先毫不知情

而當晚嘅司儀收入泡湯，佢話返屋企時就諗到自己白做，不過心想若果節目出街時，一定有好大迴響，事實亦係佢喺事業上一大轉捩點，而日常主持工作中，佢都經常遇到執生事件。
過往主持經驗亦令阿Bob嘅執生能力極高

當初以戲劇路線入行，阿Bob話過去十年都參與不少幕前演出，例如《老表，你好嘢！》系列同《美麗戰場》等，電影方面又試過擔任賀歲片男主角。阿Bob覺得做藝人要增加自己嘅可能性，所以佢係冇偏離戲劇初心。
當年參與《老表》等演出，每次都引爆笑彈

談及涉足Talk show，佢話自從十年前開始首之演出，就激發自己繼續做，當初認為自己成日做主持，只係配角，若果想做主角就要自己創造機會，於是就開始創作talk show內容。至於今次巡迴演出早由21年已經開始，到最終場能夠成功入紙紅館，收到消息一刻極之興奮，又話有睇過嘅朋友表示會再睇，背後原因係想見證佢喺紅館由台底升上台嘅一刻，令Bob非常感動，佢話今次會安排仔女入場欣賞，見證爸爸踏上紅館同感受爸爸嘅工作會得到其他人認同。

阿Bob嘅紅館演出，門票日前已正式全部售罄