鄧麗欣為下月個唱投入排練 歌迷許願聽《親朋勿友》恐落空

鄧麗欣Stephy 以藝術家身分出席一個藝術展覽活動，更向大家展示佢親手繪畫、以「花」做主題嘅畫作！Stephy嘅紅館騷會喺下個月舉行，所以現階段佢都密鑼緊鼓為演出進行排練，亦對嘉賓名單大賣關子，只肯透露係「大家見到會好開心」嘅人物。至於歌單方面，Stephy都花咗心思編排，又會睇下歌迷嘅許願歌單，但對於有唔少歌迷喺社交平台許願，希望可以聽到Stephy同Cookies舊隊友傅穎合唱《親朋勿友》，Stephy就話，自己冇睇到、冇聽到呢個建議喇！
 鄧麗欣以藝術家身分出席藝術展覽活動。
近日Stephy嘅新歌MV《不可得》正式上架，呢次Stephy挑戰多場內心戲，仲有落淚戲份，令大家都讚佢真係演得好好。而Stephy更邀請到好戲之人梁仲恆（阿丙）演出MV，不過二人就冇對手戲場面，Stephy笑言自己都唔知會咁，只好希望下次有機會再同阿丙合作。
 Stephy話冇聽過網民想聽佢同傅穎合唱《親朋勿友》。
活動當日正係元宵佳節，加上西方情人節日子亦同元宵節相近，所以大家都問Stephy會點同圈外男友度過。但係Stephy就話自己真係好忙，完全唔記得呢兩個節日，不過佢就覺得冇咩所謂，因為「天天都是情人節」。