鄧小巧自認怕嘈宅女不過情人節 老公出另類浪漫奇招得歡心

鄧小巧日前出席一個分享用藝術滋養心靈嘅宣傳活動，更同Fans大玩Art Jam，而小巧更獲得大會送出ColdPlay演唱會門票，令現場Fans好羨慕！
 鄧小巧攞出自家製「藝術品」抽獎。
不過寵粉嘅小巧都好識做，攞出自家製「藝術品」抽獎，小巧表示：「屋企係『杯滿為患』嘅狀態，因為我唔捨得掉嘢，但自己未『財富自由』到有間房擺啲手工藝品，好多初期嘅作品越擺越多，所以有時會送畀Fans。」小巧笑言老公雖然未必會同自己一齊做手工，但對方嘅「最大功用」係有時會打爛隻杯、洗爛啲碗，令屋企可以成功「送舊」，就有「迎新」嘅空間同機會。
 小巧同老公。
活動舉行期間正係喺元宵及情人節前夕，但怕熱鬧、自認「宅女」嘅小巧就講明唔會慶祝。至於問佢老公會唔會有所表示？小巧就話：「你睇佢似唔似會？佢係老粗底子！老公冒着大雨幫我去寄速遞，咁都好Sweet嘅，好過送花啦！」
小巧爆老公嘅「另類浪漫」。