AP潘宇謙新作詮釋感情三階段 鼓勵歌迷為幸福勇敢追愛

創作歌手AP 潘宇謙2025推出全新EP，亦首度挑戰單曲製作人打造純愛情歌《再一天》以及親自為EP造型操刀，特別選用偏向咖啡色調質感嘅風格呈現，希望令大家感到溫暖又自在。AP以三首情歌《再一天》、《想和你》、《幸福的軌道》詮釋感情中三個階段，從開始拍拖到熱戀後面對現實依然認定彼此嘅堅定，最後幸福步入禮堂，希望喺情人節同歌迷分享愛，為愛助攻！
 AP潘宇謙
首支專輯同名主打《想和你》曲風輕快甜蜜！AP當初寫歌時，腦海浮現畫面係幸福美滿嘅婚禮現場，對佢而言，最好嘅婚禮就係喺親人及朋友見證下分享喜悅。歌詞中嘅「我們違反著地心引力走到這裡交換戒指」，就係佢想鼓勵所有想愛嘅人忠於自我感受，即使不被旁人睇好，亦要堅定搵到自己嘅幸福。
 AP今年情人節有工作在身，唔可以同太太一齊過。
「其實你喜歡一個人，你就跟著自己的感覺就好。不用太理會其他人說什麼，因為沒有人比你更懂自己的感受。」呢份體悟也同AP感情經歷有關！已婚嘅AP比老婆細三歲，拍拖時由於佢仲係學生，所以兩人交往之初並不被認同，但佢最終用實際行動忠於所愛，最後得到老婆家人認同。
 AP同太太結婚7年。
結婚7年，同老婆有2個囝囝嘅AP，因為工作而要同老婆喺情人節分隔兩地，所以AP今年就提早同老婆食飯過節：「偶爾重複以前結婚前會做的事才會讓感情歷久常新」，又放閃感謝老婆教識佢溝通嘅重要：「老婆教會我如果發現問題的話不要憋在心中，不然的話有一天吵架的時候便會大爆發，把所有的不滿都講出來。」AP亦分享結婚後，因為有咗小朋友而好少可以有二人世界時間，不過佢都相當享受一家人喺埋一齊嘅時光。