星光路上｜林盛斌不安現狀練成「金牌司儀」 大膽講要做「曾志偉第二」獲鼓勵

有「金牌司儀」之稱嘅 林盛斌 「百足咁多爪」，無論係主持定演戲都難佢唔到。阿Bob好快仲會登陸紅館開Talk Show，呢日佢就接受TVB娛樂新聞台節目《星光路上》訪問，同主播 潘盈慧 細談入行至今嘅心路歷程。 阿Bob回想讀書時期夢想要成為紀律部隊成員，只不過警察、消防、懲教、海關等等部門都考唔過，所以先選擇繼續專注學業。

阿Bob喺《星光路上》分享入行一步一步嘅小故事
而佢人生嘅轉捩點就係臨近畢業，因為主持一個聯校唱歌比賽而認識一位資深DJ，更同對方交換聯絡方式。修讀建築學系嘅阿Bob喺畢業時同時收到兩個邀請，一：就係經老師介紹入建築公司返工，二：就係到電台營業部做銷售。

最後阿Bob選擇投身電台，更月入四、五萬，不過做咗9個月後，佢就轉換跑道加入節目部，開始DJ生涯。 阿Bob自認自細就已經好有表演欲，喺大學新鮮人時期，適逢一個為電影《少林足球》選角嘅比賽，阿Bob受到同學鼓勵而去報名。當時佢向評審林子聰表示，自己識特異功能，更因為即場示範出色得到第二輪面試機會，可以喺周星馳、吳君如、李力持導演面前獻技。
當年棄主修科目跳入電台，仲慢慢嘗試步向幕前

經過重重考驗，阿Bob終於突圍而出，更有機會喺友台舉行嘅《少林足球》選角節目同星爺演戲，最後成功得到加入劇組機會。之不過當時阿Bob只係向學校請咗一星期假，而劇組又有改動需要重拍，於是喺演戲同學業之間，阿Bob選擇辭演返港繼續讀書。 

阿Bob主持嘅電台節目《新香蕉俱樂部》一直受聽眾歡迎，但不安於現狀、不追求安逸嘅佢就開始產生更多想法，同拍檔一齊追求突破，又同拍檔嚟到電視台，做好友崔建邦嘅節目嘉賓。後來有新節目推出，阿Bob受節目組邀請。同MC JIN、陳偉霆主持清談節目《兄弟幫》，令阿Bob正式走入公仔箱。 阿Bob雖然主持經驗豐富，但由電台轉到電視台都有唔少事需要調整，而語速就係其中一樣喇！

加入電視台令阿Bob有更多人認識

阿Bob更笑言自己被要求改正䟴腳習慣，事關觀眾睇到會感覺佢好輕挑。雖然幕前演出有好多限制令阿Bob覺得唔習慣，不過佢就抱「克服不舒適」心態去學習同進步，因為佢深信適應後，可以得到更多「好嘅回報」。 

阿Bob因為一張卡片而入行做電台，嚟到幕前，佢反而冇主動拎過一張高層卡片。佢更自爆喺十幾年前一個演藝人晚宴時有一個大膽舉動，就係主動行到曾志偉身邊，講一句：「志偉哥，我要做曾志偉第二！」而志偉哥當時就話：「冇問題啊，一定要啊！」不過酒醒後阿Bob自覺失態，主動發訊息同志偉哥道歉，但志偉哥就話：「有咩所謂？人就係要有目標，你而家做得好好。」呢段經歷令阿Bob感到非常深刻，亦因此一直努力向呢個目標前進，仲會參考志偉哥嘅步伐足跡而思考自己嘅未來。