梁芷珮孖老公錫錫相放閃 玻利維亞公園慶祝結婚21週年

旅遊達人梁芷珮（Christy）不時孖住老公Kenneth周圍拍節目，最近就同老公去玻利維亞國家公園，而呢次行程除咗係拍攝旅遊內容，另外最大嘅意義係慶祝夫婦兩人21週年嘅結婚紀念日。

梁芷珮最近就同老公去玻利維亞國家公園拍攝旅遊內容，慶祝夫婦兩人21週年嘅結婚紀念日。
Christy喺社交平台分享同老公嘅錫錫相放閃，再寫上「咁快嘅？今日（21號）就結婚21週年喇！想當年得21歲，（嚟緊個大仔都21歲）老喇老喇，趁行得走得要一齊去多啲地方喇老公❤️今日週年喺玻利維亞嘅國家公園過🥰，又有溫泉又有30幾萬隻flamingo（紅鶴） 陪我哋一齊過，幾開心❤️Happy anniversary 老公！Love u love u love u!!!」

梁芷珮同老公去咗「紅湖」科羅拉達湖睇紅鶴，開心地寓工作於娛樂。
相中見二人似喺Polques小型溫泉池浸浸溫泉，見佢哋換上泳衣，坐喺池邊甜蜜咀嘴，又去咗「紅湖」科羅拉達湖睇紅鶴，開心地寓工作於娛樂。
梁芷珮與攝影師老公育有兩子一女，均安排讀國際學校。