袁偉豪養尊處優砌韆鞦散發熟男味道 約胡定欣醫生男友豪飲貴過食個餐

袁偉豪與張寶兒喺2020年結婚，喺2023年誕下兒子「袁咕碌」，袁偉豪近排少咗亮相幕前，抽多咗時間享受天倫之樂，寶兒不時喺社交平台分享屋企日常，均見到袁偉豪身影，早前寶兒分享一條幫阿仔喺豪宅花園砌韆鞦嘅影片，未知袁偉豪係咪喺屋企整個人比較relax，被網民指外貌有啲滄桑，散發出熟男味道。

袁偉豪係咪喺屋企整個人比較relax，被網民指外貌有啲滄桑，散發出熟男味道。
袁偉豪呢排養尊處優，前晚佢同太太張寶兒約埋另外三對couple飯聚，包括豹哥單立文與豹嫂胡蓓蔚、陳山聰及老婆何麗萍（Apple）、胡定欣同男友Dr Chan，有愛情滋潤嘅定欣，自從公開戀情後，喺社交平台都會寫埋男友有份出席聚會，大方放閃，而呢四對couple同樣係飲得之人，定欣笑指呢晚係Margarita之夜，佢哋8個人飲咗31杯，結果飲酒貴過食飯，定欣覺得一班人相聚最緊要係大家開心。

胡定欣自從公開戀情後，喺社交平台都會寫埋男友Dr Chan有份出席聚會，大方放閃！
袁偉豪除咗同「將軍澳街坊福利會」見面外，閒時亦跟老友吳家樂同李璨琛揸車遊車河，噚日有位女網紅喺石澳偶遇佢哋，見袁偉豪身穿型格皮褸，似係一齊揸電單車兜風，女網紅更留言話喺食早餐嘅地方見到TVB演員，仲話自己12歲嗰陣有迷戀袁偉豪，袁偉豪亦回覆：「我細細個就睇你啦係咪？」

袁偉豪閒時亦跟老友吳家樂同李璨琛揸車遊車河。
袁偉豪休息咗一段時間，亦有講吓嚟緊工作動向，佢今日喺IG動態貼出一條阿仔拎住玩具電話行嚟行去嘅影片，阿仔「袁咕碌」似乎好忙，袁偉豪就寫道：「我老闆好擔心我嚟緊工作安排。」似乎袁偉豪又要開始忙於工作！

袁偉豪休息咗一段時間，亦有講吓嚟緊工作動向。