王嘉爾新歌親自創作呈現真實自我 墮巨型水箱不斷掙扎忘命拍MV

Jackson 王嘉爾 忙完組合GOT7嘅合體活動之後，緊接就為自己第2隻個人專輯《MAGIC MAN 2》宣傳。日前Jackson推出新碟第一首單曲《High Alone》嘅MV，𣊬間喺串流平台經已突破180萬點擊喇。

王嘉爾為新歌《High Alone》MV搏到盡
新碟分為四個章節，每個章節都會呈現Jackson真實嘅經歷同心境，Jackson都話自己有份創作嘅音樂更加同自己融為一體，喺MV幕後花絮中，Jackson親自以英語剖白，因為之前從未為自己寫歌，所以覺得過往嘅歌曲好似唱緊人哋嘅歌咁，因為咁佢決心停工一年埋首創作，為自己寫歌，所以新碟嘅作品完完全全係自己嘅寫照。
創作之餘對畫面呈現亦非常執著

 《High Alone》呢首歌就可以話係新碟嘅簡介，介紹新碟嘅氛圍同格調，以及MAGIC MAN背後嘅含意，MAGIC MAN對王嘉爾嘅意義，唔係想呈現最有型嘅一面，而係呈現最真實嘅自己。 
更冒險投入水箱拍攝

新歌MV畫面亦相當震憾，Jackson唔止妝容呈現暗黑風格，更赤膊上陣望住鏡似乎同自己內心對話，而其中一幕亦相當驚險，戴住手扣嘅Jackson要浸喺玻璃水箱中不斷掙扎，呢個鏡頭一拍拍足六個鐘，真係拍到Jackson身心俱疲。

單單呢一幕就拍足6個鐘