陳法拉首日開工帶病拍企跳戲 滿臉血妝嚇到父母險心臟病發

由張家輝執導兼主演嘅新戲《贖夢》，邀請到去咗荷里活發展嘅陳法拉演出，戲中飾演一對因投資失利而陷入萬劫不復嘅夫妻，法拉喺拍攝電影時，全程都要處於陰暗抑鬱嘅狀態，首日開工仲要上演激動企跳嘅場口。

陳法拉參演張家輝自導自演嘅恐怖新片
雖然要企喺高層露台拍攝，不過因為安全措施做到足，加上開拍前又綵排咗好多次，所以即使呢日係帶病上陣演出，法拉都話唔太驚，拍咗3 take就搞掂咗呢場戲喇。

除咗首日嘅企跳戲外，呢日佢仲要拍攝一場抱住一個細路女赤腳喺街上狂奔嘅戲份。而為咗呢個咁慘嘅角色，法拉仲專登減磅演出，由於減肥嘅日子撞正聖誕同新年，加上當時同家人身處法國，搞到法拉冇得好好享受美食，難怪佢話呢次減肥慘過佢個角色嘅身世啦！
同平時嘅法拉有好大分別

喺呢兩個月嘅拍攝入面，法拉要喺香港、美國兩邊走，佢不時都會send啲工作相同家人分享，但係呢日嘅頭破血流妝就嚇到法拉嘅父母爭啲心臟病發，所以佢決定以後都唔會send呢類相畀父母呀。

咁恐怖嘅打扮，同家人分享劇照之後梗係嚇親啦