獨家丨冼靖峰為fans減少唱歌 感激方力申暗中照顧自己

冼靖峰Archie 呢日暫時放低手頭上工作，相約一大班fans聚會，為咗可以有多啲時間同大家傾偈而決定唱少啲歌，Archie話呢個決定係因為不時收到fans私訊！
冼靖峰呢日同fans舉行聚會。
粉絲們喺DM入面指佢哋專登請假嚟fans meeting，打算影多啲靚相，同偶像可以傾吓偈，點知Archie唱完3首歌就走，對此Archie解釋好多時因為場地限制問題，如果佢唔離開就會有太多人逼住喺同一空間，阻止人做生意，而有啲時候就因為後面有工作在身，搞到佢要即刻走，冇太多時間同fans交流。
Archie話為咗fans而減少唱歌。
難得同fans聚會燒嘢食，但Archie就因為減肥而要忍口，睇佢望住隻燒乳豬就知忍得幾辛苦，Archie話自己最近跟丁子朗素食減肥，但嘗試咗一段時間發生身體頂唔住失眠，所以而家會食返少少海鮮，但就儘量食少嘅肉。
Archie呢日為fans留夠時間。
Archie嘅爸爸係方力申嘅中學老師，多年嚟師生都保持密切聯絡，Archie就話自己入行後，小方呢位前輩都對佢照顧有加，成日喺啲細微位都照顧到佢，加上亦聽到啲圈中人講，小方曾經拜托大家照顧佢，令佢覺得相當窩心。
Archie因為減肥，所以呢日只好忍口。小方對Archie照顧有加。