麥美恩38歲生日被小鮮肉包圍 甜蜜幸福畫面令人羨慕又妒忌

2月28號就踏入38歲生日嘅麥美恩Mayanne，早已安排咗連串節目慶祝生日，見佢喺生日前席約埋好友周奕瑋Jarvis同埋駱胤鳴一齊去咗新加坡玩，盡情吃喝玩樂，開開心心玩咗個生日Trip。
Mayanne早前去咗新加坡旅行。同行嘅仲有周奕瑋同埋駱胤鳴。
話咁快Mayanne就返咗嚟香港，異性緣甚好嘅佢又獲全男班同佢慶祝，喺相中見Mayanne拎住一束鮮花置身一個大型Party之中，背景同Welcome Board上都寫上Happy Birthday嘅字眼。而為壽星女慶祝嘅就有丁子朗Karl、曾展望GM、孔德賢Danny，冼靖峰Archie同張鎬濂Ashley。被一班小鮮肉緊緊包圍住嘅Mayanne，個個都向佢嘟嘴獻於飛吻，女王駕到感覺十足，睇到唔少網民既羨慕又妒忌。
返港後即被小鮮肉圍住慶祝生日。
Mayanne接收晒滿滿嘅愛後，都有以大姐姐身份留言感謝大家：「All the love，姐姐表示好開心，多謝大家嘅愛，感恩有咁多人愛錫。」並喺社交平台曬出多張合照，而近日被揭同徐偉楝譜姊弟戀嘅姚子羚Elaine、森美、陳自瑤Yoyo、鄭衍峰等都有留言送上祝福。
Mayanne 生日快樂
回看昔日，其實Mayanne都唔止一次咁幸福，2月初時新年時，Mayanne亦曾夥全男班包括張振朗Owen、丁子朗、吳偉豪Ricco、孔德賢、許文軒Edmond等到澳門工作，同樣出現俾仔圍嘅畫面。
Mayanne 同 丁子朗。