新寶戲院因應市場變化 將於4月1日正式結束營業

去年先後有電影創出破億票房，不過即使入場觀眾人數似有增加，但電影業界人士就透露，業界仍然面對寒冬期。3月10號晚，在港擁有兩間戲院嘅新寶院線，就喺社交平台發出「新寶戲院結業通告」，內容指院線接手運作已20年嘅旺角新寶戲院，將營業至2025年3月31日，4月1日正式結束營業。

位於旺角鬧市絕佳位置嘅新寶戲院將營運至今個月底
新寶戲院原址為1984年開業嘅金聲戲院，通告解釋因應市場環境變化同營運調整，不得不作出結業嘅艱難決定。新寶戲院表示，結業前將繼續為大家提供精彩電影放映服務。亦再次感謝觀眾多年來支持同厚愛。新寶戲院嘅點點滴滴，將永遠留於記憶之中。
近日完成首次紅館演出嘅阿Bob，早前先租用戲院廣告位置宣傳

早喺1988年就同合夥人合組創辦新寶院線；有「戲院大王」之稱嘅陳榮美去年7月離世，佢旗下院線高峰期於港九新界共擁有17間戲院，院線簡介指新寶院線秉持住相信電影、堅持創新理念，不斷革新、重整， 務求令觀眾喺舒適環境下享受高質素視聽娛樂。

經營新寶院線嘅「戲院大王」陳榮美去年輕7月離世

新寶院線旗下嘅銅鑼灣紐約戲院去年4月底結業，當時唔少影迷於最後放映日曾把握時光到場留念，而院線同樣位於旺角嘅豪華戲院2019年結束營運，原址正改建為商廈。院線於下月新寶停運後，將只剩得屯門凱都戲院營業。

同樣有絕佳位置嘅院線旗下銅鑼灣紐約戲院去年4月結束