伍允龍朱栢康平常心面對獎項 Philip日本人氣急升想拍特攝片

第18屆亞洲電影大奬星期日晚就舉行，TVB Plus(82台)屆時將獨家電視轉播。大會喺頒獎典禮舉行前，邀請多位影人影迷交流對談， 伍允龍  朱栢康 李康生 三位入圍角逐「最佳男配角」嘅演員，日前就出席分享活動，Philip嘅父母更特別由美國返港捧阿仔場！ 

朱康同Philip作為角逐男配奬項中嘅香港演員，佢哋感到榮幸又興奮，朱康表示無論邊個得獎都好，佢都會好好享受呢一切。初次入圍嘅Philip對於入圍「演技類」獎項既驚又喜，事關佢以為自己就算某一日可以角逐頒獎典禮，應該都係入「動作指導」相關獎項。
李康生、朱栢康同伍允龍一齊參與座談會

雖然Philip入行已廿幾年，如今嘅小小里程碑令佢好開心，但唔會過於自滿嘅佢就話自己會用平常心看待一切，寬觀遠境。 提及喺初入行時，兩人曾合作拍過一個廣告飾演兩兄弟，如今可以一齊企喺舞台上，Philip、朱康都話好開心，亦冇諗過有呢一日，加上二人有共同信仰，所以佢地都覺得係神嘅安排。 

上年有多部港產片成績同口碑大豐收，不過有人指2025年香港電影會步入寒冬期，朱康就話唔擔心得咁多，可以做就盡量做好，自己較慶幸係自己可以喺舞台劇方面有所發展。又預告自己將會有舞台演出，當朱康被問「會唔會想帶Philip玩下」時， Philip就即刻拒絕，笑言：「冇得NG，我好驚。」而朱康就提議，要Philip帶自己拍下動作片，Philip更鬼馬反問：「好啊，係邊類型動作片先？」
Philip同朱康仲話要搞返次動作舞台劇

最後朱康靈機一動，認為舞台上都可以搞動作戲，邀請Philip做武指之餘，仲想佢演埋一份。Philip就話自己要做被朱康打嗰個，朱康笑言：「唔好啦，我唔可以被你打，我驚我會死。」 Philip有份主演嘅電影《九龍城寨之圍城》今年年初喺日本上映，更喺當地引起極大熱潮，Philip所演嘅角色「王九」成為大受歡迎人物之一。Philip透露自己同日本製作公司正在洽談工作，由於自己係日本動漫文化同超人系列忠實粉絲，都會期望未來有機會可以拍下超人主題嘅「特攝片」。
《城寨》令Philip喺日本人氣急升，佢就話希望有機會參加特攝片嘅演出喇

佢又笑言如果要蒙面嘅話，自己可能會要求有個露樣鏡頭，令佢打打下可以突然拉低面罩。當Philip被問：「如果要著緊身褲，你O唔OK？」時，Philip就話「蒙面超人好多uniform，有啲可以鬆啲。」而朱康就喺旁邊爆笑，表示「我都係想睇你著緊身褲。」令Philip有啲尷尬，最後用：「我中文唔係咁好，但我成全你。」結束話題。