朱紫嬈稱有同期藝人已經唔識人 感激黃劍文陳芊芸仍視佢為好友

朱紫嬈Khloe 呢日舉行新歌發布會，唔少圈中好友都有嚟撐場，當中包括賈思樂、向海嵐、鄧建明、翟威廉、黃劍文、丁文俊及陳芊芸等，當Khloe講起自己嘅音樂夢時，一度忍唔住落淚，而當年同佢同期出道嘅黃劍文同陳芊芸，亦眼泛淚光。
朱紫嬈呢日舉行新歌發布會。
相隔3年先再出新歌，Khloe話因為自己想做到盡善盡美，特別係冇公司催促下，自己就會不停改嚟改去。提起當年同黃劍文、陳芊芸為音樂打拼嘅經歷時，指嗰個年代有種相依為命嘅感覺，當時自己已經係獨立歌手，同陳芊芸就好似孖公仔一樣，而劍文就係喺Busking時認識，之後更一齊出合唱歌。Khloe指而家仲喺呢一行、同佢同期嘅藝人已經唔多，即使有大家都有各自嘅發展，而且都好成功，可能已經唔識人，不過自己就好感恩仲有一班當自己係朋友、在心中嘅舊朋友。
朱紫嬈同黃劍文識於微時。
黃劍文指做音樂係辛苦嘅，但係Khloe咁多年嚟都係咁堅持，所以都為對方開心同感動，講講下劍文又忍唔眼濕濕。而陳芊芸就指當年無論大小活動，佢都係同Khloe孖公仔咁一齊出席，仲有有對方在旁自己個心就會好定。
朱紫嬈同陳芊芸以前就好似孖公仔咁，一齊出席活動。