《闔家辣》票房大賣 君如慶功宣佈開新版齊齊打牌

由 吳君如 監製兼演出，鄭中基、 梁詠琪 、 呂爵安 主演嘅電影《闔家辣》成為今年暑期港產片票房第一位，君如日前就舉辦慶功宴，招待慰勞一班台前幕後嘅工作人員喇。 身為監製兼主演嘅君如又話，票房優異係預期之內，又話：「今日真係好開心，呢部戲對我、所有演員、台前幕後嚟都非常成功，有咁好成績，一於約齊大家食餐慶功飯。」 

最近香港刮起一陣強力支持港產片風潮，為咗延續製作出更多精彩港產片，君如喺慶功宴就宣佈會原班人馬拍一套關於打麻雀嘅賀歲片喇。」 而為咗率先感受《闔家打麻雀》嘅氣氛，君如就同古天樂、鄭中基、Gigi、黃德斌、等人即場鬥甩麻雀，仲要鬥快甩中刻有七億嘅麻雀，寓意好兆頭。之後君如話：「時間雖然緊迫，不過《闔家打麻雀》會爭取2023年初上映，仲會有神秘巨星現身。最想做到帶歡樂俾香港觀眾，而家約齊四隻腳打牌好難，呢個係我心願，因為本人非常之鍾意打牌。」