煒哥陳醫生婚宴嘴足三次 新郎誓愛足50+1朱晨麗獲花球

陳煒同陳國強醫生9月26號簽紙成為夫婦後，喺酒店設宴招待約50位親友，煒哥以一襲長袖透視蕾絲婚紗披上頭紗，喺恩師 鄭偉強 陪同下進入會場，之後將煒哥交到陳醫生手中，仲話：「你一定要好好對佢，如果唔係我唔會放過你。You are a lucky guy！」
煒哥同陳醫生喺親友見證下交換婚戒，之後喺穴客起哄下三度親吻，恩愛滿瀉。煒哥又向到場嘅好友一一道謝，佢話：「今晚嚟嘅全部都係好錫我同陳醫生嘅朋友，首先要好感激鄭偉強先生陪我入場，呢度無人比佢更有資格。佢係主宰我26年演藝人生當中好重要嘅一個人，當年如果唔係佢喺垃圾桶執返我份報名亞洲小姐履歷資料，就肯定冇今日嘅陳煒。 」

之後煒哥又特別感激甚少出席藝人婚禮嘅曾勵珍，而當煒哥提到鮑姐鮑起靜時，鮑姐仲激動得熱淚盈眶，場面相當感人。答謝完好友後，就輪到新郎哥陳醫生發言，不過新郞哥就並非答謝親友，而係以「愛的宣言」答謝老婆。

陳醫生話：「要多謝嘅人佢都講晒。我想講以前叫佢Honey，但今日之後會改口，叫佢陳太或者老婆。過往佢陪伴咗我4年，呢段時間係我人生中，最開心嘅日子，多謝你，I love you！」全場聽到拍晒手掌之後，陳醫生繼續話：「同埋想喺呢度回應佢之前講50年不變嘅報道，我係度講我係會50年+1日不變，嚟緊呢段時間都會錫你、寵你、愛你！」而煒哥亦大讚陳醫生絕對係一個細心嘅好老公。

最後嘅拋花球環節，喺現場惟二單身女士 朱晨麗 同 江美儀 嘅熱烈競爭下，結果由Morning朱奪得。