陳自瑤讚黎耀祥反應快 麥美恩許文軒緋聞擺上枱

黎耀祥、黃浩然、陳自瑤、蕭正楠、張振朗、賴慰玲呢日組隊現身節目《開心無敵獎門人》，今次迎戰係E-News主播許文軒、周奕瑋、王鎮泉、陳婉衡、吳紫韻及鞏姿希，今集焦點落喺兩位女獎老麥美恩同徐麟身上，徐麟以嬌俏仙子打扮出場，講半鹹淡廣東話惹全場爆笑。

麥美恩及許文軒嘅緋聞被擺上枱，二人面對面玩「夾麵包」，麥美恩錫落許文軒額頭足足4秒，全場即起哄大叫，而許文軒額頭亦留有紅色唇印，見大家睇得開心，許文軒再同麥美恩「夾麵包」，慘被麥美恩胸壓面部。

黎耀祥、陳自瑤及蕭正楠好耐冇玩《獎門人》，佢哋話心情好緊張，陳自瑤讚黎耀祥試玩遊戲時反應好快，黎耀祥受訪時笑言一早諗咗必勝策略：「有靚女(陳自瑤)搞掂，靚仔(蕭正楠)又有，我哋呢隊無敵，我搖旗吶喊。」賴慰玲施展混身解數玩「大電視」，而黃浩然同張振朗表示未玩過「辣辣壽桃」，笑言想食吓辣，張振朗稱絕冇包袱，因為以佢玩多年遊戲嘅經驗，每次都係輸。

ENews主播隊明顯默契失靈，陳婉衡笑稱夾dress code時因以訛傳訛，最後完全唔係同一個顏色，上次佢哋上《思家大戰》輸咗，周奕瑋擔心隊友寄予厚望，唔想拖累隊友。