星光路上丨馬浚偉演技獲珍姐鞭策 揭十級麻煩演員超惡頂

馬浚偉身兼多職自認工作狂，演戲時態度專業，做導演或監製時認真嚴肅，遇到不同崗位嘅馬浚偉，對佢留下不同印象，馬浚偉日前接受無綫娛樂新聞台《星光路上》主持人潘盈慧訪問，阿盈稱馬仔係個好照顧後輩嘅大哥哥。

馬浚偉自中三開始邊打工賣雪糕邊返學，中五畢業即踏足社會，佢笑言喜歡唱歌，參加44次歌唱比賽，於1993年因參加「第3屆先鋒歌唱比賽」獲得冠軍而入行，之後三年佢集中火力做歌手，後嚟投身演藝圈，師傅曾勵珍同伯樂李添勝叫佢試鏡拍《鹿鼎記》演康熙，其演出更獲金庸認可。

馬浚偉認為演技係必須經過實戰，更大爆多年來演技提升嘅秘密，馬浚偉指咁耐一直係師傅曾勵珍捉住佢一板一眼去教，佢笑言：「點會逃得過珍姐對眼，連你個嘴角郁咗幾多下，佢都同我數住，佢話『你個嘴做咩，你知唔知你呢個表情嘅內心戲喺邊』，咁多年每一套劇播完，珍姐睇住我啲片，就捉我上7樓指住嚟鬧，真係鬧，佢只要唔鬧你就係讚，基本每次兩個鐘頭狂炳。」馬浚偉獲珍姐真傳，更指馬仔係難得嘅正派小生，因此不准佢演又正又邪嘅角色。

馬浚偉踏入呢行30年，非常喜愛自己嘅演藝人生經歷，嘗試到不同嘅崗位及工作，而家依然係機會不斷，佢覺得好有福氣，多謝給予機會及信任佢嘅人，佢特別要多謝TVB。

馬浚偉由歌手轉戰做演員，再投身大銀幕，猶如一匹俊馬為理想勇往直前，曾做導演嘅馬仔，明白幕後辛酸，笑言做得導演多，就越來越憎唔熟讀演員，馬浚偉見過十級麻煩演員：「有時做演員好自我，同你黐支咪又話黐，又話打燈咁鬼耐，劇本你又唔熟讀，同你拍100個take，企喺度揸機仲攰過你，紅啲又唔敢鬧你，新啲俾人話兩句，又話俾人蝦。」馬浚偉覺得最大打擊係媽媽離開嗰陣，當時狂接TVB劇「麻醉」自己，唔使開工就同朋友飲酒，後嚟幾位朋友鼓勵佢睇醫生，原來患上抑鬱症，慢慢學習唔再收埋自己，漸漸走出困境。