《正義迴廊》票房破3千萬 成港產三級片票房紀錄第3位

今年港產電影再發威，繼《明日戰記》及《飯戲攻心》後，由楊偉倫、麥沛東、蘇玉華、周文健及林海峰等主演嘅電影《正義迴廊》，累積票房亦衝破3000萬大關，同時亦成為港產三級片史上票房紀錄第3位！

知道電影有咁好嘅成績，導演何爵天就繼續多謝觀眾嘅支持，仲話《正義迴廊》能夠成為香港華語三級電影票房嘅第3名，要再次多謝一眾台前幕後工作人員，同埋呢個月嚟同佢一齊四圍宣傳、謝票嘅演員同工作人員，監製翁子光亦表示：「香港電影唔係虛火！」

在片中飾演「逆子弒親案」第一被告嘅楊偉倫，就坦言最初仲擔心過票房問題，但當見到票房去到一千萬，再到而家有咁好嘅成績，佢真係好高興，仲好多謝每一位入場嘅觀眾令佢哋感受到團隊嘅努力可以得到回報。而戲中為楊偉倫辯護嘅林海峰，亦風趣表示：「觀眾勇破三千萬奇案，現實比電影更恐怖！」

飾演第二被告嘅麥沛東，就表示知道唔少觀眾都係二刷或者三刷《正義迴廊》呢套戲，所以佢好多謝觀眾用行動去撐佢哋呢知作品，佢又希望將來會有更多投資者去投資呢類型電影，或者係純香港製作嘅團隊：「咁就有更加好嘅作品可以畀到觀眾欣賞，我覺得依件事係對於香港人嚟講，或者喺唔同地區見到香港有套咁好嘅作品，其實係一件好好嘅事。」至於戲中為麥沛東辯護嘅蘇玉華，就指呢一份係生命中最佳嘅禮物，同時佢亦感謝團隊、觀眾同宇宙呀！