Celine Dion拍片親述患罕見病僵硬人症候群 將無法靈活運用聲帶唱歌

54歲嘅樂壇天后Celine Dion，早前被發現暴瘦，不禁令外界擔心佢嘅身體狀況。Celine Dion喺8號就拍片放到社交平台，同fans坦白自己患上非常罕見病「 僵硬人症候群 」（stiff person syndrome），由於受病情影響，Celine宣佈將會押後出年嘅歐洲巡迴演唱會。

Celine分別以英文同法文拍片同fans講述自己嘅情況。強硬歡笑嘅佢先同fans道歉，話抱歉自己要咁耐先可以見大家，佢坦言其實自己係好掛住大家好想同大家見面。嘆咗口大氣嘅Celine，表示自己一直都係無事不可對人言，但係之前就一直無回應過任何嘢，直到而家，佢話自己終於有勇士去坦白一切。講到眼泛淚光嘅Celine，開始交代自己病情，佢表示自己患上罕見嘅神經系統疾病 僵硬人症候群，而呢個病每一百萬人入面會有一個患上，暫時病因不明。由於患者會有痙攣、姿勢畸形、慢性疼痛等病徵，當中痙攣就嚴重影響到Celine嘅各方面日常生活，除咗行動困難之外，亦令佢無辦法好像以前咁靈活運用聲帶嚟唱歌，所以只好無奈押後2023年嘅歐洲巡迴演唱會。

由於呢個病目前無法根治，可以做嘅就只係減慢病情嘅惡化速度，Celine話佢而家必須遵守醫生嘅囑咐，好好接受治療同休息，Celine話希望可以早日康復，同埋期待再次喺台上同歌迷見面。