獨家直擊袁偉豪張寶兒結婚2週年 蜜遊新加坡首度剖白相戀經過

袁偉豪同張寶兒於2016年因拍攝旅遊節目《打工捱世界II》結緣，拍拖兩年感情穩定，於2020年拉埋天窗，日前張寶兒同袁偉豪蜜遊新加坡，慶祝結婚2週年，婚後首次蜜月旅行，老公更全程操刀做攝影師，二人接受TVB娛樂新聞主播王鎮泉（Jeoffrey）首度剖白拍拖經過。

袁偉豪自認性格任性，欣賞張寶兒夠黐線，一齊玩小型賽車、揸電單車，感謝張寶兒沿路相伴，令佢更珍惜呢份感情，求婚前先問准「準外父外母」，而張寶兒毫不知情，當日袁偉豪前往多倫多演出，受Jet lag影響瞓唔著，佢哋一齊去跑步，袁偉豪趁機求婚。

袁偉豪同張寶兒喺非洲「打工」相識，為重拾初相識感覺，呢次遊新加坡動物園等佢哋勾起定情回憶，張寶兒第一次見犀牛相當興奮，回想跟袁偉豪喺非洲大草原相處點滴：「譬如出遊飲食、點樣照顧自己，佢好泰然有自己生活態度，讓我覺得佢好淡定，佢令我眼光放開，佢嘅世界好廣闊。」

袁偉豪記得張寶兒喺拍攝中後段時，獨自到非洲會合大隊，當時攝製隊出去開工，袁偉豪負責接待張寶兒，二人喺大堂閒聊，袁偉豪望住素顏嘅張寶兒，覺得寶兒幾OK，而張寶兒覺得對方好真心，之後二人喺等轉機嗰陣又傾咗好耐，然後十幾個鐘嘅機程完全冇瞓過，一路雞啄唔斷，袁偉豪笑稱講咗自己大半生嘅事，睇吓寶兒感覺如何，又被寶兒嘅笑容吸引，同行攝製隊早已洞察先機，好識做安排佢哋一齊坐，刻意製造機會。

袁偉豪同張寶兒玩小遊戲，睇吓佢哋有幾了解對方，如果答錯可以打對方一下，結果袁偉豪連續兩條問題都答唔到，張寶兒照樣大大力打落去，笑稱50%都錯，張寶兒則非常了解老公，每題答中。