黃金萬両丨 家燕姐8年後復出拍賀歲劇 年卅晚起帶歡樂畀觀眾

已經有8年冇拍劇嘅薛家燕，終於重出江湖拍攝賀歲劇《黃金萬両》，喺入面飾演「萬家」當家萬紫千紅，同三個仔曹永廉、黃子恆同馬貫東，與及三位新抱仔麥美恩、朱智賢、江嘉敏，喺年卅晚帶歡樂畀觀眾！

自從 2015 年播出嘅《倩女喜相逢》後，家燕姐相隔8年再度演出賀歲劇，佢坦言呢之出山係想帶更多嘅歡樂畀觀眾，由於拍攝時正值最炎熱嘅時間，所以家燕姐都話拍完劇成個人瘦咗：「今次真係減到肥，瘦咗兩磅幾，我諗嗰啲係汗水嚟，因為每日一除套戲服，成件衫都係濕晒。」對於劇中三位新抱，家燕姐就話同佢哋三個一齊唔陣，會畀佢哋嘅熱情感染，令到自己唔記得自己嘅真實年紀，一齊有講有笑相當開心。

三位家嫂喺劇入面雖然要鬥餐懵，但其實佢哋三個現實中好鬼friend，麥美恩仲話江嘉敏係大家嘅開心果，仲即場模仿江嘉敏嘅小動作：「佢好鍾意個頭向下 45 度角，個雙下巴要唧出嚟，之後話『喂，你想點呀?』」而朱智賢就話平日最鍾意喺隔離食花生睇戲。

 首次拍古裝嘅江嘉敏，喺拍攝期間就一度因為炎熱天氣而輕微中暑，令佢要即時除低戲服抖 涼，幸好喺眾人悉心照顧後，佢好快就回復狀態繼續開工。

《黃金萬両》 將於年卅(21 日)至初七(28 日)晚上 8 點半翡翠台播出