黎耀祥現身撐蕭正楠曹永廉開騷 《大太監》結緣兄弟間感情深

黎耀祥、蕭正楠及曹永廉因參演劇集《大太監》結緣，成為感情深厚嘅好兄弟，阿蕭同阿廉早前喺佛山開騷，邀請視帝好友馬國明擔任個唱嘉賓，祥仔同老婆梁耀蓮（Julia）都有現身撐場，仲去後台為佢哋打氣。

祥仔同老婆梁耀蓮早前去佛山睇蕭正楠同曹永廉開騷。
祥仔老婆今日喺社交平台上載當日嘅影片，眾人一見面已熱情打招呼兼開心影大合照，祥仔為佢哋打氣，祝佢哋good show，又笑住同阿廉講多謝邀請，話出面好難買飛，祥仔睇騷都好投入咁揮動手燈，而身旁就係阿廉外父姜大衞（John哥）。

祥仔老婆今日喺社交平台上載當日嘅影片，眾人一見面已熱情打招呼兼開心影大合照。
阿蕭同阿廉當晚孖馬明唱《難兄難弟》，馬明亦獻唱鄭伊健嘅歌曲《發現》，阿蕭坦言呢個騷係兄弟班演出，仲話下次要馬明合體開演唱會，阿廉亦指喺娛樂圈搵好兄弟難，但就好易搵好老婆，笑指馬明同阿蕭「喺呢行又食又拎」。

祥仔身旁就係阿廉外父姜大衞！