隱形戰隊丨網民好奇文偉鴻殺KC次數 眾演員約埋睇結局

隨住飾演張Sir 嘅 歐瑞偉 同 飾演嬌姐 嘅程可為慘死，《隱形戰隊》今晚亦進入大結局。唔少網民睇完 KC因勇戰 陳展鵬飾演嘅匡勝天而英勇殉職後，都係網上討論起劇情嚟，當中最多人講嘅，就係到底監製文偉鴻Jazz殺咗KC幾多次？向來緊貼網民動向嘅Jazz，就係自己嘅社交平台回答網民問題：「《使徒行者》、《使徒行者 諜影行動》、《城寨》、《同盟》、《鐵拳》、《超能使者》、《隱形戰隊》，一共7次。」

講起KC喺《隱形》入面嘅演出，噚晚播出嗰集完全係騷身手之作，年屆61歲嘅佢跑完幾條街後，又要喪跑樓梯，同展鵬交手嗰陣仲拳拳到肉，體力同耐力都相當驚人。不過 KC 接受訪問嗰陣，就謙稱一切效果有賴武術指導幫忙度招，同埋Jazz 嘅節奏控制，KC話：「其實都同展鵬拍開，大家好有默契，因為之前拍好多氣氛 Shot，所以埋牙真打只係四個鐘左右。拍親 Jazz 戲大家都有心理準備，知道要埋位肉搏冇得揸流攤，全部好認真去做。」問到KC回可以Keep住咁好身手？佢就話：「都係得閒做吓掌上壓收吓腹同跑步，因為當時仲有拍緊《愛‧回家》，所以都做唔到太多運動，我依家都肥番少少咯。」


今晚播出嘅大結局將會上演馬國明飾演嘅Ocean 同匡勝天嘅「正邪大戰」，而劉穎鏇飾演嘅刑風，亦會再次大戰「最強打女」何慈茵。

為咗見證六位主角 Ocean、寶寶、邢風、Cool Sir（陳山聰飾）、Shadow (劉佩玥飾)及女女(林子善飾)最終命運，今晚一眾演員就約埋監製Jazz一齊睇結局，到時TVB娛樂新聞台會為大家直播現場情況！

《隱形戰隊》結局篇 星期一至五 20:30 翡翠台